Біяразнастайнасць Палесся пашыраецца

Біяразнастайнасць Палесся пашыраецца

23 октября 2010, 20:27
372
У аўторак, 19 кастрычніка, у заказніку «Сярэдняя Прыпяць» прайшлі сумесныя мерапрыемствы Праграмы развіцця ААН і Міністэрства прыродных рэсурсаў і аховы навакольнага асяроддзя Рэспублікі Беларусь па больш актыўным выкарыстанні экатурыстычнага патэнцыялу заказніка і аднаўленні папуляцыі сцерлядзі ў Прыпяці.

Сустрэча пачалася ў экалога-асветніцкім цэнтры. У ёй прынялі ўдзел прадстаўнікі праекта Антоніус Брук і Аляксей Арцюшэўскі, першы намеснік міністра Міністэрства прыродных рэсурсаў і аховы навакольнага асяроддзя Анатоль Ліс, старшыня райвыканкама Васіль Агіевіч, прадстаўнікі  мясцовых зацікаўленых устаноў.

Дырэктар заказніка Васіль Мардухай распавёў пра біяразнастайнасць Прыпяцкага Палесся, расказаў пра развіццё экатурызму ў рамках названай праграмы. Зроблена ўжо нямала. Для турыстаў падрыхтаваны домік, месцы адпачынку, экалагічная сцяжынка “Па лазовай даліне”, водны маршрут да Мікашэвіч са стаянкамі і наведваннем вёсак Кажан-Гарадок, Лахва і Сінкевічы.

Затым удзельнікі мерапрыемства прайшліся па экасцяжынцы, азнаёміліся з біясферай, месцамі адпачынку, з вышкі палюбаваліся заліўнымі лугамі, магутнымі дубамі.

Значнай падзеяй стала зарыбленне Прыпяці сцерляддзю. Трохгадовую моладзь прывезлі з рыбгаса “Сялец”, што на Бярозаўшчыне. Трэба зазначыць, што сцерлядзь з’яўляецца адзіным відам сямейства асятровых на Беларусі і занесена ў Чырвоную кнігу. Выбраны ўчастак на Прыпяці мае невялікі міграцыённы шлях, забяспечаны кормам, ёсць месцы для нерасту і зімоўкі. Гэта толькі пачатак для наступнага, больш шырокага пашырэння новага віду рыбы ў мясцовых рэках.

Быў таксама праінспектаваны рэканструяваны польдэр “Ракітна”, работы на якім вяліся згодна з праектам ПРААН/ГЭФ.