Пад гукі дуды

Пад гукі дуды

09 августа 2012, 13:00
1478
Днямі на Лунінеччыну завітала група творчых людзей, якія цікавяцца нацыянальнай гісторыяй, культурай і дойлідствам.

Падобныя вандроўкі пастаянна ладзяць кіраўнік этнагістарычнага цэнтра “Явар” Ірына Клімковіч і былая супрацоўніца акадэмічнага Інстытута гісторыі, кандыдат навук, адзін з вядучых беларускіх археолагаў Людміла Дучыц. У сферы цікаўнасці гасцей — найперш старажытныя храмы, іншыя культавыя і сакральныя мясціны (у тым ліку могілкі, крыніцы, камяні і г.д.). Па падліках Л.Дучыц, цяперашняя вандроўка (перад Лунінеччынай госці завіталі ў Петрыкаўскі і Жыткавіцкі раёны) — 122-я на рахунку арганізатараў. Дарэчы, адным з вынікаў падобных падарожжаў стала сумесная кніга І.Клімковіч і Л.Дучыц.

Сярод удзельнікаў групы на гэты раз былі вядомыя літаратары Аксана Спрынчан (ураджэнка Лунінца) і Максім Клімковіч, гісторык і музыка Яраш Малішэўскі, дацэнт БДПУ імя М.Танка, кандыдат філалагічных навук Юлія Гурская ды інш.

У нашым раёне госці наведалі амаль усе вясковыя храмы, што захаваліся з мінулых стагоддзяў (найбольш уразілі іх старэйшая на Лунінеччыне Свята-Георгіеўская царква ў Сінкевічах), пазнаёміліся з цікавымі мясцінамі прыроды, здзейснілі экскурсію і па вуліцах Лунінца. А Яраш Малішэўскі (які, дарэчы, як раз адзначаў свой дзень народзінаў) выканаў для сяброў некалькі мелодый на дудзе ля хаты па вуліцы Гагарына (былой Царкоўнай), дзе калісьці нарадзілася ягоная жонка.