Фізкультура па-лунінецку
24 января 2014, 13:42

Фізкультура па-лунінецку

На тэму фізічнай культуры ў раёне гутарым з Іванам Фёдаравічам Тадорскім. Яшчэ нядаўна ён узначальваў Дзятлавіцкую сярэднюю школу, выкладаў фізкультуру. Зараз на заслужаным адпачынку, але тэмай валодае дасканала.
Поделиться

— Іван Фёдаравіч, а ўвогуле, якая яна, сітуацыя з фізічнай культурай у раёне?

— Мы гэта бачым па спартыўным жыцці раёна. А яно не такое ўжо і насычанае.

— Што Вы маеце на ўвазе?

— Напрыклад, з-за недахопу сродкаў зусім звернута першынство раёна па футболе, у якім раней прымалі ўдзел амаль усе каманды гаспадарак. Спаборніцтвы былі нават у дзвюх лігах!

— А што зараз?

— А зараз адзіная футбольная каманда аматараў — СВК «Новае Палессе» — удзельнічае у першынстве …Жыткавіцкага раёна.

— Але ж не адзіным футболам жыве чалавек?

— Праводзяцца раённыя турніры па валейболе, баскетболе, настольным тэнісе сярод дарослых і школьнікаў, лёгкай атлетыцы сярод школьнікаў. Пры гэтым толькі школы штогод выстаўляюць свае каманды, але сярод дарослых колькасць каманд памяншаецца, бо інструктараў па спорце няма амаль нідзе.

— А чаму такая сітуацыя?

— Зноў жа пытанне ў фінасаванні: хто ж будзе гэтую работу бясплатна выконваць? Энтузіязму бракуе.

— А калі паглядзець больш аптымістычна?

— Нягледзячы на цяжкасці, спартыўнае жыццё раёна існуе. «Граніт» выступае ў першай лізе чэмпіянату Беларусі па футболе, два клубы — у вышэйшай лізе па міні-футболе, а хакейная каманда «Лунінец» — у сваім аматарскім першынстве. Праводзяцца спаборніцтвы сярод кіраўнікоў устаноў, настаўнікаў і інш. Таму бачыць усё ў негатыве  будзе не зусім правільна. Нейкім чынам фізкультура і спорт у раёне існуюць.

— А ў параўнанні з мінулымі гадамі?

— Вядома ж, раней фізкультурная справа была пастаўлена намнога лепш.

— Іван Фёдаравіч, а каго з энтузіястаў ці проста людзей, апантаных гэтай справай, Вы можаце адзначыць?

— Сярод настаўнікаў фізкультуры школ — Васіля Мацвеевіча Коўшыка з Дварэцкай школы. Гэта несумненны лідар сярод настаўнікаў школ раёна. Яшчэ ёсць у Лунінскай школе Аляксандр Іванавіч Гарагляд. Настаўнік-пенсіянер Аляксей Іванавіч Гнедзька з СШ №1 г Лунінца — з таго ж кола. Але ж найбольш апантаны спортам Валерый Іванавіч Жукоўскі — трэнер Лунінецкай спартыўнай школы алімпійскага рэзерву. Яшчэ — дзятлавіцкія настаўнікі фізічнай культуры Уладзімір Васільевіч Кацуба і Віктар Фёдаравіч Канапацкі. Каманды Дзятлавіцкай школы на працягу многіх гадоў стабільна становяцца пераможцамі і прызёрамі штогадовых спартакіяд сярод школьнікаў.

— Чаго нестае раёну, на Ваш погляд, у плане папулярызацыі фізкультуры?

— Проста шакуе адсутнасць першынства раёна па плаванні. Маючы басейн у Лунінцы — і не праводзіць спаборніцтвы ў гэтым відзе спорту? Раней яно праводзілася на базе басейна Дубаўскай СШ.

— Спадзяемся, што з цягам часу сітуацыя з фізічнай культурай выправіцца.

— І я маю надзею на гэта. Бо гэта часцінка майго жыцця.